Епископ Леонид: уырыссаг чырыстон аргъуан тобæгонд дæсныйæдты тыххæй кæй бацæттæ кодта, уыцы документы проект у нысанæмраст æмæ растгонд

Дзæуджыхъæуккаг æмæ Алайнаг епископ Леониды хъуыдымæ гæсгæ, уырыссаг чырыстон аргъуан, уæлфæдзæхстадмæ бар чи нæ дары, уыцы тобæгонд дæсныйæдты тыххæй цы документы проект бацæттæ кодта, уый у нысанæмраст æмæ растгонд. Йæ ныхæстæм гæсгæ, документы бæлвырдгонд æрцыд, дины кусæг цы дæсныйæдты ма хъуамæ архайа, уыцы фæлгæт. Æмæ уый, фыццаджыдæр, "баст у намысон æмæ аргъуанон этикæимæ, æмæ йæ дины кусджытæ сæхæдæг дæр хъуамæ æмбарой".

"Кæй зæгъын æй хъæуы, дины кусæгæн уыцы иу рæстæг цы дæсныйæдты ис архайæн, уыдоны бæлвырдгонд сты. Сауджын иу кæнæ иннæ æфсæддон операцийы комкоммæ архайæг уа, уымæн уæвæн нæй, ацы документы амынд æндæр цавæрдæр хъуыддæгтыл дæр не сразы уыдзыстæм", - бамбарын кодта епископ.

Зæрдыл куыд æрлæууын кодта, афтæмæй Уæрæсейы дины кусæг кæддæриддæр "аргъуаны мидуаты хардзæй царди æмæ ныр дæр материалон æгъдауæй ифтонггонд у". Уымæ гæсгæ Уæрæсейы, уыцы иу рæстæг динæн дæр чи лæггад кæны æмæ граждайнаг куыст дæр чи кæны, уыдон сты дины кусджыты иумæйаг нымæцы минимум. Уый, епископ Леониды ныхæстæм гæсгæ, арæхдæр фæсарæнты æмбæлы. "Фæсарæнты бирæ азты дæргъы фæдæн, æмæ уым дины кусджытæн æндæр гæнæн нæй, æмæ сæ бинонты дарыны тыххæй уæлдай куыст ссарынц, уымæн æмæ чидæр мызд исы, чидæр та нæ, хатт та уыцы мызд дæр фаг нæ вæййы. Раст зæгъгæйæ, уым уæлдайаг æмæ диссагæй æппындæр ницы ис", - загъта епископ.

Уырыссаг чырыстон аргъуан рæгъмæ рахаста, уæлфæдзæхстадмæ бар чи нæ дары, уыцы тобæгонд дæсныйæдты номхыгъдыл æрныхас кæныны хъæппæрис, бацæттæ кодта æмбæлон документы проект. Документы проект фенæн ис Мæскуыйаг патриархаты официалон сайтыл. Ацы номхыгъдмæ гæсгæ, сауджынтæн дохтыртæ, æфсæддонтæ, паддзахадон кусджытæ, æрфарсты органты кусджытæ, банкиртæ, адвокаттæ кæнæ казиноты хицæуттæ уæвæн нæй. Проект æрвыст æрцыд епархитæм аргълæвæрдтæ райсыны тыххæй. Документы проектмæ комментаритæ æмбырд кæны Æхсæнаргъуанон уæвынады аппарат 2 майы онг.
 

Наталья Цхуырбаты, "15 регион"
Подробнее: http://region15.ru/news/2017/02/21/15-11/