СбÆрÆг сты уÆлахиздзаутÆ

Дзӕуджыхъӕуккаг ӕмӕ Алайнаг епархи, РЦИ-Аланийы Нывгӕнджыты цӕдис ӕмӕ РЦИ-Аланийы истори ӕмӕ археологийы институт афӕдз размӕ цы конкурс расидтысты, "Аллоныстон: ивгъуыды сурӕттӕ", зӕгъгӕ, уый республикӕйы культурон царды ссис ахсджиаг цау. Нывгӕнджытӕ ацы хъуыддаг сӕ зӕрдӕмӕ арф айсгӕйӕ, бавнӕлдтой хъазуатонӕй ӕмӕ скодтой бирӕ зӕрдӕмӕдзӕугӕ куыстытӕ. Кӕттӕгтыл ӕвдыст ӕрцыдысты ирон адӕмы историйы хицӕн цаутӕ, историон хъайтарты сурӕттӕ, чырыстон Алани.

Сӕрмагонд къамисы уӕнгтӕ афӕдзы дӕргъы сӕ хъус дардтой нывгӕнджыты куыстытӕм, ӕххуыс сын кодтой историон ӕрмӕджытӕй дӕр. Декабры кадджын уавӕры Нывгӕнджыты цӕдисы равдыстыты залы конкурсы архайӕг нывгӕнджытӕ сӕ куыстытӕ адӕмы размӕ куы рахастой, уӕд къамисы уӕнгтӕн ӕнцон нӕ уыд хуыздӕрты сбӕрӕг кӕнын. 17 нывгӕнӕджы равдыстмӕ ӕдӕппӕт бацӕттӕ кодтой 43 нывы. Уыдысты кӕттагыл конд ӕмӕ графикон нывтӕ. Конкурсы архайдтой куыд хистӕр кары нывгӕнджытӕ, афтӕ ӕрыгон фӕлтӕрты минӕвӕрттӕ дӕр. Куыстытӕ дих кодтой ӕртӕ номинацийыл: "Чырыстон Аланийы историйы тыххӕй сюжетон ныв, бӕстӕйыл саргъуыд, чырыстон дины тыххӕй йӕ зӕххон цард нывондӕн чи ӕрхаста, уыцы рӕстуд ӕмӕ сыгъдӕг удты сгуыхтдзинӕдтӕ"; "Алани- Ирыстоны тыххӕй историон сюжетимӕ ныв", "Историон хъайтары портрет".
Къамисы уӕнгтӕ сбӕрӕг кодтой хуыздӕр сфӕлдыстадон куыстытӕ ӕмӕ знон Цӕгат Ирыстоны Абайты Васойы номыл гуманитарон ӕмӕ социалон иртасӕнты институты конференцитӕгӕнӕн залы Дзӕуджыхъӕуккаг ӕмӕ Алайнаг Епархийы архиепископ Леонид, РЦИ-Аланийы нывгӕнджыты цӕдисы сӕргълӕууӕг Мӕргъиты Таймураз кадджын уавӕры конкурсы ӕппӕт архайджыты дӕр схорзӕхджын кодтой Дипломтӕй, уӕлахиздзаутӕн та ма радтой премитӕ дӕр епархийы фондӕй.
Проекты разамонӕг, епархийы культурӕйы хайады сӕргълӕууӕг Дзугкойты Фатимӕ, аивадиртасӕг Биазырты Людмилӕ ӕмӕ конкурсы къамисы сӕрдар, профессор Бзарты Руслан куыд загътой, афтӕмӕй къамисы уӕнгты иумӕйаг уынаффӕмӕ гӕсгӕ уӕлахиздзаутӕн се 'ппӕтӕн дӕр снысан кодтой ӕмхуызон премитӕ. Нӕ дзы уыд дихдзинад фыццаг ӕмӕ ӕртыккаг бынӕтты хсӕн, уымӕн ӕмӕ иууылдӕр уыдысты дыккаг бына- ты уӕлахиздзаутӕ.
Дипломтӕ ӕмӕ премитӕ райстой: Бигъаты Юри ("Гражданская война. Селение Батако. 1918 г."), Джыккайты Мурат ("Святой Гоар"), Плиты Георги ("Вола Тлиаг"), Николай Василенко (нывты сери "Степь"), Къулиты Зинӕ ("Во имя чести"), Харебаты Давид ("Конная лава Сангибана"), Гасынты Жорж ("Поэт.Хетагуров"), Кокайты Валери ("За свободу Болгарии"), Харебаты Валан ("Коста"). Сӕрмагонд преми та лӕвӕрд ӕрцыд Кцойты Юрийӕн йе сфӕлдыстадон куыстытӕ "Анахарсис" ӕмӕ "Сангибан и Гоар"-ы тыххӕй.
Архиепископ Леонид куыд радзырдта, афтӕмӕй конкурсӕн дарддӕр дӕр уыдзӕн цӕрӕнбон ӕмӕ ма араздзысты ӕндӕр ахсджиаг конкурстӕ дӕр. Уӕлахиздзауты куыстытӕ та 2022 азы, Уӕрӕсейы Аланийыл саргъуыды 1100 азы юбилей куы бӕрӕг кӕной, уӕд ӕвдыст ӕрцӕудзысты Мӕскуыйы равдыстыты хуыздӕр залтӕй иуы.

ХЕТÆГКАТЫ Оксанӕ